Bilakhed Accident Chalisgaon : चाळीसगाव तालुक्यातील बिलाखेड गावाजवळ सोमवारी (१ सप्टेंबर) रात्री सुमारे नऊ वाजण्याच्या सुमारास भीषण अपघात झाला. रस्त्याने पायी जाणाऱ्या तीन महिलांना भरधाव चारचाकी वाहनाने जोरदार धडक दिली. या दुर्घटनेत एका महिलेचा जागीच मृत्यू झाला, तर अन्य दोन महिला गंभीर जखमी झाल्या आहेत. जखमी महिलांवर रुग्णालयात उपचार सुरू आहेत.

अपघाताची तीव्रता एवढी होती की, धडकेनंतर परिसरात एकच खळबळ उडाली. घटनेची माहिती मिळताच स्थानिक नागरिकांनी घटनास्थळी धाव घेतली. काही वेळातच परिसरात नागरिकांची मोठी गर्दी झाली. जखमी महिलांना तातडीने रुग्णालयात दाखल करण्यात आले.

अपघातानंतर ग्रामस्थांचे रस्ता रोको आंदोलन

या घटनेनंतर संतप्त झालेल्या ग्रामस्थांनी घटनास्थळी रस्ता रोको आंदोलन सुरू केले. वारंवार होणाऱ्या अपघातांच्या पार्श्वभूमीवर संबंधित वाहनचालकावर कठोर कारवाई करावी, अशी मागणी ग्रामस्थांकडून करण्यात आली. आंदोलनामुळे काही काळ वाहतुकीवर परिणाम झाला आणि परिसरात तणावाचे वातावरण निर्माण झाले.

हेही वाचा : वेहगी गावाचा रस्ता-पुलाचा प्रश्न गंभीर; २१ दिवसांचा अल्टिमेटम, जलसमाधी आंदोलनाचा इशारा

चाळीसगाव शहर पोलिसांकडून तपास सुरू ( Bilakhed Accident Chalisgaon )

अपघाताची माहिती मिळताच चाळीसगाव शहर पोलीस घटनास्थळी दाखल झाले. पोलिसांनी परिस्थिती नियंत्रणात आणत नागरिकांशी चर्चा केली. त्यानंतर अपघाताची नोंद आणि पुढील कायदेशीर प्रक्रिया सुरू करण्यात आली.

दरम्यान, भरधाव वाहनामुळेच हा अपघात झाला का, तसेच दुर्घटनेमागील नेमके कारण काय होते, याचा पोलीस तपास सुरू आहे. अपघातातील वाहनचालकाबाबतही पोलिसांकडून माहिती घेतली जात आहे.