Jalgaon Sugar Price Protest : साखरेच्या वाढत्या दराविरोधात जळगाव शहरात समाजवादी पक्षाच्या वतीने अनोख्या पद्धतीने आंदोलन करण्यात आले. शहरातील टॉवर चौकात नागरिकांना साखरेचे पुडे वाटून साखरेच्या दरवाढीचा निषेध करण्यात आला. वाढत्या महागाईमुळे सर्वसामान्य नागरिकांच्या घरखर्चावर परिणाम होत असल्याचा आरोप यावेळी आंदोलनकर्त्यांनी केला.
समाजवादी पक्षाचे जिल्हाध्यक्ष अशफाक अहमद पटेल यांच्या नेतृत्वाखाली हे आंदोलन करण्यात आले. यावेळी पक्षाचे कार्यकर्ते मोठ्या संख्येने उपस्थित होते. हातात साखरेचे पुडे घेऊन कार्यकर्त्यांनी सरकारविरोधात घोषणाबाजी करत वाढत्या साखरेच्या दरांकडे नागरिकांचे लक्ष वेधले.
साखर वाटून सरकारच्या धोरणाचा निषेध ( Jalgaon Sugar Price Protest )
या आंदोलनाचे वैशिष्ट्य म्हणजे ज्या साखरेच्या वाढत्या दराचा निषेध करण्यात येत आहे, त्याच साखरेचे नागरिकांना वाटप करून सरकारच्या धोरणावर उपरोधिक टीका करण्यात आली. ‘साखर महाग, जनता त्रस्त’ असा संदेश देत सर्वसामान्यांना महागाईचा सामना करावा लागत असल्याचे आंदोलनकर्त्यांनी सांगितले.
आंदोलनकर्त्यांच्या म्हणण्यानुसार, साखरेच्या वाढत्या किमतीचा परिणाम थेट सर्वसामान्यांच्या दैनंदिन खर्चावर होत आहे. त्यामुळे सरकारने साखरेचे दर नियंत्रणात आणण्यासाठी तातडीने उपाययोजना कराव्यात, अशी मागणी करण्यात आली.
हेही वाचा : वेहगी गावाचा रस्ता-पुलाचा प्रश्न गंभीर; २१ दिवसांचा अल्टिमेटम, जलसमाधी आंदोलनाचा इशारा
साठेबाजीवर कारवाईची मागणी ( Jalgaon Sugar Price )
साखरेच्या दरवाढीमागे साठेबाजी किंवा कृत्रिम भाववाढ होत असल्यास त्याची चौकशी करून संबंधितांवर कठोर कारवाई करावी, अशी मागणी समाजवादी पक्षाने केली. तसेच सर्वसामान्यांना परवडणाऱ्या दरात साखर उपलब्ध करून देण्यासाठी सरकारने ठोस पावले उचलावीत, अशी मागणीही करण्यात आली.
