Jalgaon Drugs Case : शहरात अमली पदार्थांच्या विक्रीला आळा घालण्यासाठी जळगाव स्थानिक गुन्हे शाखेने (LCB) मोठी कारवाई केली आहे. अमली पदार्थ विक्रीसाठी एक व्यक्ती येणार असल्याची गोपनीय माहिती पोलिसांना मिळाली होती. या माहितीच्या आधारे सापळा रचून पोलिसांनी एका तरुणाला ताब्यात घेतले. त्याच्याकडून एमडी, एफेड्रीन, दोन मोबाईल फोन आणि एक दुचाकी असा एकूण सुमारे ११ लाख १७ हजार रुपयांचा मुद्देमाल जप्त करण्यात आला आहे.

पोलिसांनी दिलेल्या माहितीनुसार, स्थानिक गुन्हे शाखेच्या पथकाला अमली पदार्थांच्या विक्रीसंदर्भात गोपनीय माहिती मिळाली होती. त्यानंतर पोलिसांनी नियोजन करून संबंधित ठिकाणी सापळा रचला. संशयित व्यक्ती तेथे आल्यानंतर त्याला ताब्यात घेण्यात आले.

झडतीदरम्यान अमली पदार्थ जप्त ( Jalgaon Drugs Case )

संशयिताची झडती घेतली असता त्याच्याकडे सुमारे ११ ग्रॅम एमडी आणि १ किलो ९६३ ग्रॅम एफेड्रीन आढळून आले. यासोबतच दोन मोबाईल फोन आणि सुझुकी बर्गमन दुचाकी देखील पोलिसांनी ताब्यात घेतली. जप्त करण्यात आलेल्या या सर्व मुद्देमालाची एकूण किंमत सुमारे ११ लाख १७ हजार रुपये असल्याची माहिती पोलिसांनी दिली आहे.

हेही वाचा : जळगावसह खान्देशात बाप्पाच्या आगमनाची उत्साहात तयारी

एनडीपीएस कायद्यान्वये गुन्हा दाखल

या प्रकरणी जळगाव शहर पोलीस ठाण्यात संबंधित आरोपीविरोधात एनडीपीएस कायद्यान्वये गुन्हा दाखल करण्यात आला आहे. अमली पदार्थांचा साठा आणि त्यामागील व्यवहाराबाबत पुढील तपास सुरू असून, या प्रकरणात आणखी कोणाचा सहभाग आहे का, याचाही तपास केला जात आहे.

जळगाव शहरात अमली पदार्थांच्या वाढत्या व्यवहाराला आळा घालण्यासाठी पोलिसांकडून कारवाया सुरू असून, या कारवाईमुळे अमली पदार्थांच्या विक्रीशी संबंधित व्यक्तींमध्ये खळबळ उडाली आहे.