Silencer Theft Jalgaon : वाहनांच्या सायलेंसरमध्ये वापरल्या जाणाऱ्या मौल्यवान धातूंसाठी कॅटॅलिटिक कन्व्हर्टरची चोरी केली जात असल्याचा प्रकार पारोळ्यात समोर आला आहे. राष्ट्रीय महामार्ग क्रमांक ५३ वर म्हसवे गावाजवळ पारोळा पोलीस ठाणे आणि महामार्ग पोलीस केंद्र, पाळधी यांच्या संयुक्त नाकाबंदीदरम्यान संशयास्पद वॅगनार कार अडवण्यात आली. वाहनाची तपासणी केली असता चोरीच्या कॅटॅलिटिक कन्व्हर्टरचा संशयास्पद मुद्देमाल आढळून आला.

नाकाबंदीत संशयास्पद कार पोलिसांच्या हाती ( Catalytic Converter Theft Jalgaon )

महामार्गावर सुरू असलेल्या नाकाबंदीदरम्यान पोलिसांनी वॅगनार कारची तपासणी केली. यावेळी कारमध्ये आसीफ यामीन आणि आरीफ सलीम हे दोघे आढळून आले. पोलिसांनी दोघांना ताब्यात घेतले असून, त्यांच्या ताब्यातून जुन्या मारुती सुझुकी ईको वाहनांचे तीन सायलेंसर किंवा कॅटॅलिटिक कन्व्हर्टर जप्त करण्यात आले.

पोलिसांच्या कारवाईत अंदाजे ५ ते ६ किलो ‘सायलेंसर माती’ जप्त करण्यात आली आहे. जप्त मुद्देमालाची अंदाजे किंमत ५० हजार रुपये असल्याचे सांगण्यात आले आहे.

हेही वाचा : मोबाईलच्या वाढत्या वापरावर भाष्य; AI आणि शिक्षकांच्या भूमिकेवर भर

प्लॅटिनम, पॅलेडियम आणि रोडिअमवर चोरट्यांची नजर? ( Silencer Theft Jalgaon )

कॅटॅलिटिक कन्व्हर्टरमध्ये प्लॅटिनम, पॅलेडियम आणि रोडिअम यांसारख्या मौल्यवान धातूंचा वापर केला जातो. या धातूंना आर्थिक मूल्य असल्याने त्यासाठी कन्व्हर्टरची चोरी केली जात असावी, असा पोलिसांचा प्राथमिक संशय आहे. विशेष म्हणजे या प्रकरणात मारुती सुझुकी ईको वाहनांच्या सायलेंसरला लक्ष्य केले जात असल्याचे प्राथमिक तपासातून समोर आले आहे.

ताब्यात घेण्यात आलेल्या संशयितांकडून मुंबई आणि ठाणे परिसरातही अशाच प्रकारच्या चोऱ्या केल्याची प्राथमिक माहिती मिळाल्याचे पोलिसांनी सांगितले आहे. मात्र, या माहितीची अधिकृत पडताळणी अद्याप सुरू आहे. चोरीचे कॅटॅलिटिक कन्व्हर्टर नेमके कुठे विकले जात होते? त्यातून मिळणाऱ्या पावडरचा पुढे कशासाठी वापर केला जात होता? तसेच या प्रकरणामागे आणखी कोणाचे नेटवर्क आहे का? या सर्व बाबींचा तपास पारोळा पोलिसांकडून सुरू आहे.

पारोळा पोलिसांच्या सतर्कतेला यश

महामार्गावरील नाकाबंदीत संशयास्पद वाहनाची तपासणी केल्यामुळे हा प्रकार उघडकीस आला. या कारवाईनंतर कॅटॅलिटिक कन्व्हर्टर चोरीचे आणखी प्रकार समोर येण्याची शक्यता असून, पोलिस तपासातून या प्रकरणातील संपूर्ण नेटवर्कचा उलगडा होतो का, याकडे लक्ष लागले आहे.