जितेंद्र कोतवाल | जळगाव प्रतिनिधी
Jalgaon ST Bus : जळगाव विभागातील एसटी प्रवाशांसाठी महत्त्वाची बातमी आहे. महाराष्ट्र राज्य मार्ग परिवहन महामंडळाच्या जळगाव विभागाच्या ताफ्यात आणखी सात नव्या ‘राजमाता जिजाऊ’ बसेस दाखल झाल्या आहेत. या बसेसचे लोकार्पण पालकमंत्री गुलाबराव पाटील यांच्या हस्ते करण्यात आले. नव्या सात बसेसच्या समावेशामुळे जळगाव विभागातील ‘राजमाता जिजाऊ’ बसेसची संख्या आता 70 वर पोहोचली आहे.
नव्या बसेसमुळे जळगाव जिल्ह्यातील ग्रामीण तसेच शहरी भागातील प्रवाशांना एसटी सेवेचा अधिक विस्तार मिळण्याची अपेक्षा आहे. वाढत्या प्रवासी संख्येच्या पार्श्वभूमीवर ताफ्यात नव्या बसेसची भर पडल्याने विविध मार्गांवरील वाहतूक व्यवस्थेला त्याचा फायदा होऊ शकतो.
पालकमंत्री गुलाबराव पाटील काय म्हणाले?
लोकार्पण कार्यक्रमावेळी गुलाबराव पाटील यांनी एसटी ही सर्वसामान्य नागरिकांच्या दैनंदिन प्रवासातील महत्त्वाची सार्वजनिक वाहतूक व्यवस्था असल्याचे सांगितले.
जळगाव विभागाच्या एसटी सेवेला आवश्यक ते सहकार्य आणि पाठबळ दिले जाईल, अशी भूमिका त्यांनी व्यक्त केली. नव्या बसेसमुळे प्रवाशांना अधिक सुरक्षित आणि आरामदायी प्रवास उपलब्ध करून देण्यावर भर असल्याचेही त्यांनी सांगितले.
हेही वाचा : जिल्हा बँकेवरून रक्षा खडसे विरुद्ध चंद्रकांत पाटील! ‘आधी आत्मचिंतन करा’ म्हणत आरोप-प्रत्यारोप
स्वच्छता आणि वेळेचे पालन करण्यावर भर ( Jalgaon MSRTC )
प्रवाशांना चांगली सेवा देण्यासाठी केवळ नवीन बसेस उपलब्ध करून देणे पुरेसे नसून बससेवेच्या गुणवत्तेकडेही लक्ष देणे आवश्यक असल्याचे यावेळी सांगण्यात आले.
बसेसची स्वच्छता, सुरक्षितता आणि वेळेचे पालन यावर प्रशासनाने विशेष लक्ष द्यावे, असे आवाहन पालकमंत्र्यांनी केले.
‘राजमाता जिजाऊ’ बसेसची संख्या 70 ( Jalgaon ST Bus )
जळगाव विभागात यापूर्वी 63 ‘राजमाता जिजाऊ’ बसेस कार्यरत होत्या. आता त्यात आणखी सात बसेसची भर पडल्याने एकूण संख्या 70 झाली आहे. राज्यभरात टप्प्याटप्प्याने अशा स्मार्ट बसेस वाढवण्याची योजना असून या बससेवेत आधुनिक सुविधा उपलब्ध करून देण्यावर भर आहे.
जळगाव विभागात नव्या बसेस दाखल झाल्याने प्रवाशांना आगामी काळात अधिक सुविधा मिळतील, अशी अपेक्षा व्यक्त केली जात आहे. मात्र कोणत्या मार्गांवर या नव्या बसेस सुरू करण्यात येणार आहेत, याबाबतची माहिती संबंधित एसटी विभागाकडून जाहीर होणे अपेक्षित आहे.
